AndiaLan aurkeztu da, Andia Mankomunitateak Abartzuzan duen elkarlanerako gunea

otsaila 25, 2021

AndiaLan aurkeztu da, Andia Mankomunitateak Abartzuzan duen elkarlanerako gunea

Espazioa ekintzaileei, autonomoei eta besteren kontura lan egiten dutenei irekita dago

 

 

25-02-2021

Gaur goizean, Abartzuzan, AndiaLan coworking-a edo elkarlanerako gunea aurkeztu dute, Udal Eskola zaharretan kokatua dagoena.

Ekitaldian izan dira, aurrez aurre eta telematikoki, Jesús María Rodríguez, Toki Administrazioaren eta Despopulazioaren Zuzendari nagusia; Juan Carlos Castillo, NUKFko presidentea; Carmen Puerta eta Iñigo Nagore, TEDEReko presidentea eta kudeatzailea, hurrenez hurren; Andia Mankomunitatea osatzen duten bost udaletako alkateak, Alberto Pagola, Abartzuzako alkatea, Pedro Soto, Gesalatzeko alkatea, Mikel Etxebeste, Lezaungo alkatea, Patxi Eraso Jaitzeko alkatea eta Edorta Lezaun, Deierriko alkatea eta Mankomunitateko burua; entitateko teknikaria, Elena Cereceda; Amaia Aisa, Lizarrako Enplegu Agentziako Burua; eta Itxaso Ruiz de Las Heras, Zizur Nagusiko Udalean Toki Garapenerako teknikaria.

AndiaLan proiektu pilotuaren bidez, Andia Mankomunitateak eskualdea dinamizatu nahi du. Honela, erraztuko du jarduera ekonomiko berria sortzea eta lehendik dagoena indartzen lagunduko du. Azken helburua biztanleria bertan finkatzea da eta, horretarako, lankidetza, berrikuntza eta tokiko talentua sustatuko ditu.

Autonomoei, ekintzaileei eta langileei irekita dagoen Gune hau, zeinean dagoeneko bost lagunek adierazi duten interesa, Andia Mankomunitateak egindako diagnostikoaren ondoren sortu da. Horretan, 18 eta 40 urte bitarteko gazteen % 81ek eskualdean bizitzen jarraitzeko borondatea adierazten zuten, baina enplegurik eza zen horretarako oztopo nagusietako bat. Ia erdiek adierazi zuten noizbait ekitea pentsatu zutela, horretarako laguntza eta Interneterako sarbide egokia behar zirela adieraziz, eta horixe izan zen ildo horretan aurrera egiteko jasotako proposamenetako bat.

Kokapena aukeratzeko arrazoiak izan dira, alde batetik,  Eskola Zaharren eraikina berreskuratzeko interesa, Zumadia ikastetxea ireki ondoren erabilerarik gabe geratu zena, eta, bestetik, interneteko zerbitzua eskaintzeko asmoa, Abartzuza baita Mankomunitatean zuntza duen herri bakarra. Eraikina berreskuratzeko prozesuan ingurumenaren eta ekonomia zirkularraren irizpideak kontuan hartu dira eta tokiko lana sustatu da.

AndiaLanek hiru areto ditu, batetik Esparatz eta Dulantz aretoak ditugu, lanera bideratuak, osotara bederatzi lanpostu, office bat eta armairu pribatuak dituen biltegia daude bertan, eta bestetik La Trinidad aretoa, prestakuntzarako, topaketetarako eta sormenerako gune bat.

Hitzarmena Nafarroako Enplegu Zerbitzuarekin

Andia Mankomunitatea Servicio Navarro de Empleo-Nafar Lansare (SNE-NL)-rekin hitzarmena sinatu duten zazpi toki entitateetako bat da, udalerri bakoitzean ad hoc enplegu-politika aktiboak ezartzeko, kontuan hartuta bertako biztanleen demografia, azpiegiturak, ekoizpen-sarea edo ikasketa-maila.

Helburua da enplegu-politika aktiboen lau ardatz nagusietan sinergiak sortzea: prestakuntza, enplegatzea, orientazioa eta aholkularitza autoenplegurako eta ekintzaile izateko bertan, eta AndiaLan izango da eskualdeko erreferentzia-puntua.

Andia Mankomunitatea despopulazioaren aurka

Ekintza hori Andia Mankomunitateak bultzatutako despopulatzeari aurre egiteko jarduera-programaren parte da. Programa hori Jurramendi azpieskualdeko despopulazioaren aurkako ekintza-planaren barruan dago, eta Nafarroako Gobernuak egin du.

Andia, osatzen duten toki entitateen eta beste toki entitate batzuen arteko lankidetzarako eta elkarren arteko ikaskuntzarako espazio gisa ulertzen da. Jarduera horien bidez, gazteen beharrei erantzun nahi zaie, eskualdeko jarduera sozioekonomikoa dinamizatu, enplegu berriak sortzen lagundu eta daudenak indartzen lagundu, gure biztanleria finkatu ahal izateko. Horregatik, tokiko lankidetza, berrikuntza eta talentua sustatzen duten hainbat ekimen lantzen ari dira, hala nola Bizi Lezaun proiektua, abeltzaintzako Test-guneak sortzea eta energia berriztagarriak bultzatzea, besteak beste.


<< atzera